ዮሃንስ 10፡1-21=> ንሕና ድምጹ እንሰምዕ፣ ካብ ድምጺ ካልእ ድማ እንገልብ ኣባጊዕ መጓሴኡ ከም ዝዀንና፣ ጐይታና የሱስ ድማ ፡ እቲ እንኮ በይኑ ደገ ኣባጊዕን እቲ ህይወቱ በጃና ኪህብ ካብ ሰማይ ዚመጸ ሕያዋይ ጓሳና ከም ዝዀነ ብንጹር ይገልጽ።
ዮሃንስ 10፡22-30 => ብዛዕባ ካብቲ ቅድሚኡ ዘሎ ክፍልታት ዝቀጸል ግጭት ኣይሁድ ምስ የሱስ እዩ ዝገልጽ። ግጭች ኣይሁድ ምስ የሱስ ብፍላይ ኣብ ዮሃንስ 5 ምዕራፍ እዩ ዝጀምር። ጐይታ ነቲ 38 ዓመት ዝሓመመ ሰብኣይ ብመዓልቲ ሰንበት ስለ ዘሕወዮ፡ ኣይሁድ ንጐይታ ብትሪ ተቛዊመሞ። (ዮሃንስ 5፡10-16)
“ያበጠ ይፈንዳ (ዚሓበጠ ይተኰስ)” ዚዓይነቱ ከኣ፡ ኣብ ዮሃንስ 5፡17-30=> ጐይታ ከም ወዲ ኣምላኽ ንካልኦት ህይወት ብምሃቡን ፍርዲ ዘበለ ኩሉ ዚፈርድ ንሱ ብምዃኑ፡ በዚ ማዕረ ኣቦ ከም ዝዀነ፡ ከምቲ ነቦ ዚግበኦ ኪብሪውን ከም ዝግበኦ ብግልጺ ነጊርዎም።
እዚ ከይኣክል ኣብ ምዕራፍ 9 ንዘሎ ብዕውሩ እተወልደ ሰብኣይ ጐይታ ብመዕልቲ ሰንበት የሕውዮ። ነዚ ሰብኣይ እዚ ድማ ኣይሁድ ካብ ደምበ ሃይማነቶም የባርርዎን የሳድድዎን። እዞም ኣብ ዮሃንስ 10 ዘለዉ ናይ ሓቂ ኣባጊዕ እምባኣር ከምዚ ሰብኣይ እዚ ዝኣመሰሉ ብሃይማኖት ተባሪሮም ካብቲ ናይ ሃይማኖት ደምበ ዚወጹ፡ እሞ ናብቲ ናይ ሓቂ ደምበ ኣባጊዕ ግና በቲ እንኮ በይኑ ናይ ሓቂ ደገ ኣባጊዕ (=የሱስ) ኣቢሎም ዚኣተዉ ሰባት እዮም። ዮሃንስ 10:1-21 ብዛባዚ እዩ ዝዛረብ።
ናብ ዮሃንስ 10፡22-30 ምስ እንመጽእ፡ ኣብቲ ቀዲሙ ዘሎ ምዕራፋት ብንጹር ተገሊጹ ከም ዘሎ እቲ እናዓበየ እናዓበየ ኪመጽእ ዚጸንሐ ግጭት እዩ ናብ ዝለዓለ ጠርዙ ገጹ ዚዀይድ ዘሎ።
“ኣብ ኢየሩሳሌም በዓል ምሕዳስ ቤተ መቕደስ ኰነ፡ ክረምቲ ኸኣ ነበረ። ኢየሱስ ድማ ኣብ ቤተ መቕደስ ኣብ ገበላ ሰሎሞን ይመላለስ ነበረ። ሽዑ ኣይሁድ ኣኽበብዎ እሞ፥ ክሳዕ መኣዝከ ኢኻ ላሕ እተብለና፡ ንስኻ ክርስቶስ እንተ ዄንካ፡ ኣግሂድካ ንገረና፡ በልዎ። ኢየሱስ መለሰሎም፥ ነጊረኩም ኣይኣመንኩምን። እዚ ብስም ኣቦይ ዝገብሮ ዘሎኹ ግብርታት ይምስክረለይ አሎ። ንስኻትኩም ግና፡ ከምቲ ዝበልኩኹም፡ ካብተን ኣባጊዔይ ስለ ዘይኰንኩም፡ ኣይትኣምኑን ኢኹም። እተን ኣባጊዔይ ግና ድምጼይ ይሰምዓ፡ ኣነ ኸኣ ኤለልየን፡ ንሳተንውን ይስዕባኒ። ኣነ ኸኣ ህይወት ዘለኣለም እህበን፡ ንዘለኣለም ድማ ኣይጠፍኣን እየን፡ ካብ ኢደይውን ዚምንዝዔን የልቦን። እቲ ንኣታተን ዝሃበኒ ኣቦይ ካብ ኵሉ ይዓቢ እዩ’ ካብ ኢድ ኣቦይ ሓደ እኳ ኺምንዝዔን ዚኽእል የልቦን። ኣነን ኣቦን ሓደ ኢና።” (ዮሃ.10፡22-30)
ኣብዚውን እቲ ዘረባ ወይ ክርክር ብምስትውዓል ምስ እንምልከቶ፡ “ኣባጊዔይ፣ ኣባጊዔይ ኣይኰንኩምን!ብስም ኣቦይ! ኣባጊዔይ ድምጸይ ይሰምዓ! የለልያ! ይስዕባኒ! ህይወት ዘለኣለም እህበን! ካብ ኢደይን ካብ ኢድ ኣቦይ ዝምንዘዐን የለን! ኣነን ኣቦን ሓደ ኢና!” ወዘተ ዝብል እዩ! እዚ ከኣ ንኣይሁድ ፈውሲ ዘይርከቦ ሕሱም ሕማም መርዘን እዩ! ሓሪቆም! ተናዲዶም! ጐይታ እንታይ ስለ ዝበለ እዮም ኪሳዕ ኪንድዚ ሕሪር ኢሎም ነዲዶም? ካልእ ዘይኰነስ ኣቦይ ስለ ዝበለ! ኣነን ኣቦን ሓደ ኢና ስለ ዝበለ!
ተናዲዶም ጥራይ ኣይኰንኑ! ንጐይታና ኪቀትልዎ ደልዮም!
“ኣይሁድ ብዳርባ እምኒ ኪቐትልዎ ኸም ብሓድሽ እምኒ ኣልዓሉ።” (ዮሃ.10፡31)
በዚ ተገባሮም እተገረመ ጐይታ፡ “እዋ! እንታይ ስለ ዝገበርኩ ኪትቀትሉኒ ትደልዩ ኣለኹም!? ሰናይ ኪንዲ ዝገበርኩ? 38 ዓመት ዚሓመመ፣ ብዕውሩ ንእተወልደ ስለ ዘሕወኹ? ንህዝቢ እቲ ቅኑዕ ምህሮ ስለ ዝመሃርኩ!? እዚ ተገባር እዚስ ብዳርባ እምኒ የቅትል? ”
“ኢየሱስ ከኣ፥ ካብ ኣቦይ ብዙሕ ሰናይ ግብርታት ኣርኤኹኹም። ስለ ኣያናዪ ግብሪ ኢኹም ብዳርባ እምኒ ኽትቀትሉኒ እትደልዩ ዘሎኹም፧ ኢሉ መለሰሎም። ኣይሁድ ከኣ፥ ስለቲ ምጽራፍካን ሰብ ክነስኻ ንፍስኻ ኣምላኽ ስለ ምግባርካን እምበር፡ ስለቲ ጽቡቕ ግብርታትካስ ኣይኰንናን ብእምኒ እንቐትለካ፡ ኢሎም መለስሉ። ኢየሱስ መለሰሎም፥ ኣብ ሕግኹም፥ ኣነ፥ ኣማልኽቲ ኢኹም፡ በልኩ፡ ዚብልዶ ኣይተጻሕፈን እዩ፧ ነቶም ቃል ኣምላኽ ዝመጸሎም ኣማልኽቲ ኻብ ዚብሎም፡ -ጽሑፍ ኪፈርስ ኣይከኣልን እዩ፦ ነቲ ኣቦ ዝቐደሶ ናብ ዓለምውን ዝለኣኾ ግዳ፡ ወዲ ኣምላኽ እየ ስለ ዝበልኩኹም፡ ከመይ ኢልኩም፥ ትጻረፍ አሎኻ፡ ትብሉኒ አሎኹም፧ ግብሪ ኣቦይ እንተ ዘይገበርኩ፡ ኣይትእመኑኒ። እንተ ገበርኩ ግና፡ ኣቦ ኣባይ ምህላዉ፡ ኣነውን ኣብ ኣቦ ምህላወይ ምእንቲ ኽትፈልጡን ከተስተብህሉንሲ፡ ንኣይ እኳ እንተ ዘይኣመንኩምኒ፡ ነቲ ግብረይ እመንዎ። መሊሶም ድማ ኪሕዝዎ ደለዩ፡ ንሱ ግና ካብ ኣእዳዎም መለቘ።” (ዮሃ.10፡32-39)
ካብዚ ክፍሊ እዚ ተበጊሶም “ንሕና ኣማልኽቲ ኢና!/We are Gods” ዝብል ዓቢዪ ትምህርቲ ስሕተት ምሂሮም ዚሓለፉ ከም በዓል ኬነት ሃጌን ዝበሉ መማህራን ምንቅስቃስ እምነት፣ ልክዕ ከም ፓፓ ጋሎ ድማ ከይመርመሩ፣ ነቲ ጽሑፍ እቲ ዓንቀጽ ብግቡእ ከየጽንዑን ነዚ ትምህርቲ ስሕተት እዚ ሎሚ ዘዕፍርዎ ከም በዓል ሃይሉ ዮሃንስ ዝበሉ ሰዓብቶም ኪትርኢ ከሎኻ፡ ዓሚቘ ሓዘን ኢኻ ትሓዝን።
ክቡራት ኣንበብቲ እስከ በጃኹም፡ ንዮሃንስ 10፡34-36 ተጠንቂቁም ኣንብቡዋ?
“34 ኢየሱስ መለሰሎም፥ ኣብ ሕግኹም፥ ኣነ፥ ኣማልኽቲ ኢኹም፡ በልኩ፡ ዚብልዶ ኣይተጻሕፈን እዩ፧
35 ነቶም ቃል ኣምላኽ ዝመጸሎም ኣማልኽቲ ኻብ ዚብሎም፡ -ጽሑፍ ኪፈርስ ኣይከኣልን እዩ፦
36 ነቲ ኣቦ ዝቐደሶ ናብ ዓለምውን ዝለኣኾ ግዳ፡ ወዲ ኣምላኽ እየ ስለ ዝበልኩኹም፡ ከመይ ኢልኩም፥ ትጻረፍ አሎኻ፡ ትብሉኒ አሎኹም፧”
እስከ ኣገደስቲ ሕቶታት ኪሓትት፦
1. የሱስ ፥ “ኣነ ሓደ ካብቶም ኣማልኽቲ እየ” ኢሉ ድዩ? እዚ ማለት ጐይታ ካብ መዝሙር 82 ዚጠቀሰ ምኽንያትሲ ንሱ ኣማልኽቲ ከም ዝዀነ ንኸረጋግጸሎም ኢሉ ድዩ? ያ ኣይፋሉ! ንኸምኡ ኣይኰነን ፈጺሙ!
ጐይታ ካብ መዝሙር 82 ዚጠቀሰ፡ ንሱ ኣምላኽቲ ምዃኑ ንኸርእዮም ስለ ዝደለየ ዘይኰነስ ወዲ ኣምላኽ ከም ዝዀነ ንኸርእዮም ደልዩ እዩ።
እቶም ኣብ ሕጊኹም ዘለዉ ፈርድቲ ኣማልኽቲ ካብ ተባህሉሲ ፡ ኣነ ሎሚ ወዲ ኣምላኽ እየ እንተበልኩ እንታይ እዩ እቲ ጸገምኩም ወይ እንታይ እዩ እቲ ገይጋይ? እዩ ዝብሎም ዘሎ ጐይታ!
2. ወይስ ኣብዚ ክፍሊ እዚ ፡ደቀ መዛሙርቱ ኣማልኽቲ ከም ዝዀኑ ጐይታ ተዛሪቡ ወይ ሚሂሩ ድዩ?ኣይተዛረበን ፈጺሙ!
3. ኣብ ዝዀነ ኣብ ካልእ ስፍራ ኣብ ሓድሽ ኪዳን፡ እቶም ደቀ መዛሙርቱ ኣማልኽቲ ከም ዝዀኑ ጐይታ ምሂሩ ድዩ?ኣይመሃረን ፈጺሙ! ንምሉእ ሓድሽ ኪዳን ኣንብቦዎ ባዕልኹም! እቲ ቅዱስ መጽሓፍ ኣብ ኢድኩም ኣሎ ብቛንቋኹም!
4. ኣብዚ ምሉእ ምዕራፍ እዚ፡ እቶም ሰዓብቲ ጐይታ ኩሎም ኣባጊዕ ከም ዝዀኑ ድዩ የሱስ ምሂሩ፡ ወይ ኣማልኽቲ ከም ዝዀኑ? ኣባጊዕ ከም ዝዀኑ ጥራይ እዩ ምሂሩ! ባዕልኹም ኣንብብዎ!
5. ብመሰረቱ ኣብ ዮሃንስ 10፡31-39 ዘሎ ክፍሊ፡ ብዛዕባ የሱስ ጥራይ ድዩ ዝዛረብ ዋላስ ብዛዕባ ደቀ መዛሙርቱ ዀላይ!? ብዛዕባ የሱስ ጥራይ እዩ ዝዛረብ! ባዕልኹም ኣንብብዎ ነቲ ኽፍሊ!
6. “ንሕና ኣመንቲ ኩላህና ኣማልኽቲ ኢና!” እናበሉ ዝምህሩ ሰባት ዮሃንስ ምዕራፍ 10 ይድግፎም ድዩ? ያ ኣይድግፎምን ፈጺሙ!
7. ኣብ መዝሙር 82 ዘሎ እሞ “ኣማልኽቲ ኢኹም” ዝብል ሓረግ፡ ንሒደት ሰባት ጥራይ፡ ንሳቶም ከኣ ንናይ እስራኤል ፈረድቲ ጥራይ እተዋህበ ድዩ ነይሩ ወይስ ንኹሉ እቲ ኣብ ብሉይ ኪዳን ዝነበረ ህዝቢ እስራኤል? ንውሑዳት ሰባት ጥራይ፡ ንሳቶም ከኣ ንናይ እስራኤል ፈረድቲ ጥራይ እተዋህበ እምበር!
8. እሞ ከመይ ገይሮም ደኣ ሎሚ መማህራን ምንቅስቃስ እምነት ፥ ኩሉ ኣማኒ ኣማልኽቲ ከም ዝዀነ ብጭፍን ተዓሚቶም ይምህሩ ኣለዎ? “ፍደል ይቀትል!” ዝብል ጽሑፍ ስለ ዝበጽሖም!
ንዓንቀጽ እቲ ቅዱስ ጽሑፍ ኣኽብሮት ዘይህቡ፡ ካብ ካልኦት ኣዚና ንፈልጥ ኢና ብዝብል ትዕቢት ተወጢሮም እተነፍሑ፡ ብቃል ኣምላኽ ኪምዘኑ ከለዉ ግና፡ ብርግጽ ዕዉራት መርሕቲ ዕዉራት እዮም!
እወ! ነቲ ቃል ሓቂ ብትኽክልን ትኽንትኽን ዘይመቅል (2ጢሞቴዎሥ፡15)፣ እንታይ ደኣ ካብቲ ሓደ ናብቲ ሓደ ክፍሊ ሓሓሊፉ እናዘለለ ፊደል ጥራይ ዚጠቅስ፡ ወይ ዕዉር መራሕ ዕዉር እዩ፡ ወይ ከኣ ነቲ ቃል ሓቂ ዚጠዊ ጠዋዪ ሓቂ እዩ! (2ጰጥሮስ 3፡16-17)
እዞም መማህራን እዚኣቶም “ኩሉ ኣማኒ ኣማልኽቲ እዩ!” ኢሎም ንኽምህሩ መዝሙር 82 ኰነ ዮሃንስ 10 ኣይድግፎም ፈጺሙ!
መዝሙር 82 ንናይ እስራኤል ፈረድቲ (ነቶም ኣብ ልዕሊ እቲ ኣብ ብሉይ ኪዳን ዝነብረ ድሑን ህዝቢ ኣምላኽ ዝነብሩ ፈረድቲ) ጥራይ እዩ ዚዛረብ!
እዚ ከኣ ኣብ ሓድሽ ኪዳን ንዘሎና ኩላህና ኣመንቲ ዚምልከት ጥቅሲ ኣይኰነን ፈጺሙ! ንሓና እቶም ናይ ሓድሽ ኪዳን ኣመንቲ፡ ኣብ ልዕሊ እቶም ካልኦት ኣመንቲ ፈረድቲ ኣይኰናን ፈጺምና! ንሕና ኣብ ልዕሊ ሕድሕድና እተሾምና ፈረድቲ ኣይኰንናን!
ወይ ከኣ ኣብ ልዕሊ ዓለም እተሾምና ፈረድቲ ኣይኰንናን!
“ሓደ ኻብቶም ህዝቢ ድማ፥ መምህር፡ ንሓወይ ርስተይ ኪመቕለኒ በለለይ፡ በሎ። ንሱ ኸኣ፥ ኣታ ሰብኣይ፡ ኣባኻትኩምከ ዳኛን መማቐልን ገይሩ መን ሸይመኒ፧ በሎ። ንሱ ኸኣ፥ ህይወት ሰብ ብብዝሒ ገንዘብ ኣይኰነትን እሞ፡ ተጠንቀቑ፡ ካብ ኵሉ ስስዔ ኸኣ ርእስኹም ሐልዉ፡ በሎም።” (ሉቃስ 12፡13-15)
ኣምላኽ ንኣና ኣብ ልዕሊ ዓለም ዳኛታትን ፈረድትን ገይሩ ኣይሸሞናን!
“ምስ ኣመንዝራታት ኣይትጸምበሩ ኢለ ኣብታ ደብዳበይ ጽሒፈልኩም ኣሎኹ። ግናኸ ምስ ኣመንዝራታት እዛ ዓለም እዚኣ ወይስ ምስ ስሱዓትን ዘረፍትን ወይስ ምስ መምለኽቲ ጣኦት ኢለ ግዳ ኣይኰንኩን ዝጸሐፍኩ፡ እንተ ዘይኰነስ ካብዛ ዓለም እዚኣ ኽትወጹ ምተገብኣኩም ነይሩ። ሕጂ ግና ምስ ሓደ ሓው ዚብሃል እሞ ኣመንዝራ፡ ወይስ ስሱዕ፡ ወይስ መምለኽ ጣኦት፡ ወይስ ተጻራፊ፡ ወይስ ሰካር፡ ወይስ ዘራፊ እንተ ዀይኑ፡ ምስኡ ኸይትጽምበሩ፡ ምስ እዚ ኸምዚ ዝበለ ከቶ ኸይትበልዑ፡ ጽሒፈልኩም ኣሎኹ። ነቶም ኣብ ወጻኢ ዘለዉ ምፍራደይሲ እንታይ ገዲሱኒ እዩ፧ ነቶም ኣብ ውሽጢ ዘለዉ እትፈርዱ ግዳ ንስኻትኩምዶ ኣይኰንኩምን፧ ነቶም ኣብ ወጻኢ ዘለዉ ግና ኣምላኽ ኪፈርዶም እዩ። ነቲ እኩይ ካባኻትኩም ኣውጽእዎ።” (1ቈረንቶስ 5፡9-13)
እዚ ሃዋሪያ ይብል ኣሎ፡ “ነቶም ኣብ ወጻኢ ዘለዉ ግና ኣምላኽ ኪፈርዶም እዩ!!!” ኣብ ወጻኢ ንዘለዉ ምፍራድ ንኣኻ ኣይተዋህበን!
ኣብ ቤት ኣምላኽ ንዘለዉ እትህቦ ፍርዲኸ እንታይን ከመይን እዩ? ብሓቂ ዶ ብዓይነቱ ከምቲ እቶም ኣብ መዝሙር 82 ተጠቂሶም ዘለዉ ፈረድቲ ዝፈርድዎ ሽመት ፍርዲ እዩ? ናይ ኣይፋሉ!
እቲ ኣብ ብሉይ ኪዳን ዝነበረ ህዝቢ እስራኤል ብምልኡ እኮ ኣብ መንጎኡ ኣብዚ ፍጸም ኣብ ልዕሊ ዝዀነ ዘይ ኣምላኻዊ ግፍዕን ሓጢኣትን ይፈርድ ነይሩ እዩ። ነዚ ብዛዕባ ዝምልከት እዩ ጳውሎስ ኣብዚ ቀዳማይ ቈንረቶስ ዝዛረበሉ ዘሎ።
እዚ ጥራይ ግና ኣይኰነን እቲ ሓቂ። ካብዚ ከምዚ ዓይነት ሓፈሻዊ ፍርዲ ዝፈረድ ምሉእ ህዝቢ እስራኤል እተፈልዩ ኣካል ዝዀኑ፡ ኣብ ላዕሊ ተቀሚጦም ዝፈርዱ ብቁጽሪ ውሱናት ዝዀኑ ፈረድቲ ሰባት ድማ ነይሮም። መዝሙር 82 ከኣ ብዛዕባ እዞም ሕደት ሰባት እዚኣቶም ጥራይ እዩ ዝዛረብ ዘሎ። እቲ ኣማልኽቲ ዝብል ቃልውን ነዞም ውሱናት ሰባት እዚኣቶም ጥራይ እዩ ዘመልክት።
እዞም ሎሚ ኣብ ማእከልና “ንሕና ኣማልኽቲ ኢና!” ዝብሉ ዘለዉ መማህራን ግና ኣሽንኳይ ዶ ኣብ ዓለም ንዘሎ ዓምጽ፣ በደል፣ ርኽሰትን ኩሉ ምትሕልላፍን ኪፈርዱን ኪኹንኑንሲ ኣብ መእከሎም ንዘለዉ ሓጢኣት ዝለማመዱን ብስድነት ዝመላለሱን ኣመንቲ እኳ፡ መጽሓፍ ቅዱሳዊ ኣምላኻዊ ዲሲፕሊን ዘይህቡን ነቲ እኩይ ካብ ማእከሎም ዘየውጽኡ ኪሳዕ ኪንድዚ ንፉሓትን ዕዉራትን እዮም!
“ምንዝርና ብሱሩ፡ ከምኡ ዘመሰለ ምንዝርናስ ኣብቶም ኣህዛብ እኳ ዜልቦ፡ ማለት፡ ሓደ ኻባኻትኩም ነታ ሰበይቲ ኣቦኡ ኸም ዘእተወ፡ ይውረየኩም ኣሎ። ምስናይዚ ኸኣ ተነፊሕኩም ኣሎኹም እሞ፡ እቲ እዚ ግብርዚ ዝገበረ ኻብ ማእከልኩም ምእንቲ ኺርሕቕ ኢልኩም፡ ከቶ ኣይጒሄኹምን።” (1 ቈረንቶስ 5፡1-2)
“ኣማልኽቲ ኢና!” ድማ ይብሉ ሳክት ኣብ ማእከል ጐልጐል!
እዚኣቶም ነቲ ቃል ሓቂ ግቡእ ጊዜ ሂቦም ብምጽናዕ ዘይምህሩ፣ ንጥፍኣት ርእሶምን ሰማዕቶምን ፍደል ጥራይ ብምጥቃስ ናብ ምህሮ ስሕተት እተፈነዉ ሰባት እዮም።
ንመዝሙር 82፡ ሾሞንተ ጥቅስታት ጥራይ እየን ዘለዋኣ። እቲ ኣማልኽቲ ዝብል ቃል ንመን ከም ዘመልክቲ ኣዚዩ ንጹር እዩ። ሃነ ሓቢርና ነንብቦ።
1 ኣምላኽ አብ ማሕበር ኣማልኽቲ ደው ይብል፣ አብ ማእከል ኣማልኽቲ ይፈርድ ኣሎ።
2 ክሳዕ መአዝ ኢኹም ሓሶት እትፈርዱ፧ ንገጽ ረሲኣንስ እተድልዉ፧
3 ንምግዱርን ንዘኽታምን በይኑሎም፣ ንጭኑቕን መስኪንን ፍትሒ አውጽኡሎም።
4 ንድኻን መስኪንን ኣናግፍዎም፣ ካብ አእዳው ረሲኣን ኣድሕንዎም።
5 ኣይፈልጡን፣ ኣየስተውዕሉን፣ አብ ጸልማት ይመላለሱ፣ ብዘሎ መሰረታት ምድሪ ይናወጽ ኣሎ።
6-7 ኣነስ፣ ኣማልኽቲ ኢኹም፣ ኵላትኩም ውሉድ እቲ ልዑል ኢኹም፣ ግናኸ ከም ሰብ ክትሞቱ፣ ከም ሓደ ኻብቶም መሳፍንቲውን ክትወድቁ ኢኹም፣ በልኩ።
8 ዎ ኣምላኽ፣ ንዅሎም ኣህዛብ ክትወርስሲ፣ ተንስእ ንምድሪ ፍረዳ።
ኣብዘን ጥቅሲታት እዚኣተን ክልተ ጉጅለ ሰባት ኣለዉ፥
እቶም ቀዳማይ ጉጅለ =>ኣብ ጥቅሲ 1 “ማሕበር ኣማልኽቲ፡ ማእከል ኣምላኽቲ” ዝብሎም ዘሎ፣ ኣብ ጥቅሲ 2 “ሓሶት እትፈርዱ፣ ንረሲእ እተድልዉ” ዝብሎም ዘሎ፣ ኣብ ጥቅሲ 3፡ “በይኑ፣ ፍትሒ ኣውጽኡ” ዝብሎም ዘሎ፣
ኣብ ጥቅሲ 4 ” ኣናግፉ፣ ኣድሕኑ” ዝብሎም ዘሎ
ኣብ ጥቅሲ 6-7 ድማ ፥ “ኣማልኽቲ ኢኹም፣ ኵላትኩም ውሉድ እቲ ልዑል ኢኹም፣ ግናኸ ከም ሰብ ክትሞቱ፣ ከም ሓደ ኻብቶም መሳፍንቲውን ክትወድቁ ኢኹም፣” ዝብሎም ዘሎ።
እምባኣር እዚኣቶም እቶም ሰበ ስልጣን ወይ ብቁጽሪ ውሱናት ፈረድቲ ሰባት እዮም። ኣብ ልዕሊ እቲ ካልእ ህዝቢ ዝፈርዱ ሰባት!
እቲ መበል ካልኣይ ጉጅለ ግና፡ ነቲ ዝተረፈ ህዝቢ ብምልኡ ዘመልክት እዩ። ነኣብነት ኣብ ጥቅሲ 2፥ ኣብቲ ህዝቢ ንዘለዉ ሰባት ኣመልኪቱ፡ “ገጽ ረሲኣን” ይብል፣ ኣብ ጥቅሲ 3: ” ንምግዱርን፣ ንዘኽታምን፣ ንጭኑቕን መስኪንን” ይብል፣ ኣብ ጥቅሲ 5: “ንድኻን መስኪንን ኣናግፍዎም፣ ካብ አእዳው ረሲኣን ኣድሕንዎም።” ይብል።
እምባኣር እዞም ኣብ ጥቅሲ 2, 3, 4, 5 ዘለዉ፥ “ረሲኣን፣ ምግዱር፣ ንዘኽታም፣ ንጭኑቕ፣ መስኪንን፣ ንድኻን” ዝብሉ ቃላት ነቲ ዓመጽቲ ሰባትን ተዓመጽቲ ሰባትን ዚሓቘፈ ምሉእ ህዝቢ እስራኤል ኣመልኪቱ እዩ ዝዛረብ።
እቲ ኣብ ጥቅሲ 1, 2,3,4, 6-7፡ “ማሕበር ኣማልኽቲ፣ ማእከል ኣማልኽቲ፣ ሓሶት እትፈርዱ፣ ንረሲእ እተድልዉ፣ በይኑ፣ ፍትሒ ኣውጽኡ፣ ኣንግፉ፣ ኣድሕኑ፣ ኣማልኽቲ ኢኹም፣ ኵላትኩም ውሉድ እቲ ልዑል ኢኹም፣ ግናኸ ከም ሰብ ክትሞቱ፣ ከም ሓደ ኻብቶም መሳፍንቲውን ክትወድቁ ኢኹም፣” ዝብሎም ዘሎ ድማ፡ ነቶም ኣብ ልዕሊ እቲ ምሉእ ህዝቢ እስራኤል ብጽድቅን ብሓቂን ንኪፈርዱ ኣምላኽ ዚሾሞም ብቁጽሪ ሕደት ዝዀኑ ፈረድቲ ሰባት ኣመልኪቱ እዩ ዝዛረብ ዘሎ!
እሞ እዚ ክፍሊ እዚ ኩሎም ህዝቢ ኣምላኽ ኣማልኽቲ ከም ዝዀኑ ይምህር ድዩ? ያ ኣይምህርን ፈጺሙ!
እስከ ተመልከቱ፥
ቀዳማይቲ ነጥቢ) ብመሰረት መዝሙር 82:1-8=> ኩሎም እቶም ህዝቢ ኣምላኽ ፈረድቲ ድዮም? ያ ኣይፋሎም!
ካልኣይቲ ነጥቢ) እሞ እቲ “ማሕበር ኣምላኽቲ፣ ማኣከል ኣማልኽቲ፣ ኣማልኽቲ ኢኹም” ዝብል ሓሳብ ንኹሉ እቲ ህዝቢ ኣምላኽ ኣመልኪቱ እተነግረ ቃል ድዩ? ያ ኣይፋሉ!
በጃኹም ንኸም በዓል ሃይሉ ዮሃንስ ዝበሉ ሰበኽቲ፡ ነቲ ቃል ኣምላኽ ኮፍ ኢሎም ከም በሓድሽ ኪመሃርዎ ምኸርዎም! ብትምህርቶም ስሒቶም ንብዙሓት የስሕቱ ኣለዉ!
ኣብዚ ቀረባ ጊዜ ኣብ ዝገበሮ ኮንፈረንስ ኪምህር ከሎ፡ ንመዝሙር 82፡1 ጠቂሱ ማለት እዩ፡ እቶም ዚሰምዕዎ ዝነብሩ ሰባት ብምልኦም ኣማልኽቲ ከም ዝዀኑ ኪምህር ሰሚዐዮ ኣዚየ ሓዚነ ኣለኹ።
ንመዝሙር 82፡1 ብዓንቀጽ እቲ ምሉእ ምዕራፍ ዘይኰነስ ብዓንቀጽ እቲ ካብቶም ዝሓለፉ መማህራኑ እተቀበሎ ናይ ስሕተት ትምህርቲ እዩ ተዛሪብዎ!
“እግዚአብሔር በአማልክት ማኅበር ቆመ፥ በአማልክትም መካከል ይፈርዳል።” /ኣምላኽ አብ ማሕበር ኣማልኽቲ ደው ይብል፣ አብ ማእከል ኣማልኽቲ ይፈርድ ኣሎ።”(መዝሙር 82:1)
በቃ ነዛ ጥቅሲ እዚኣ ንጽል ኣቢልካ ብምንባብ “እታ ማሕበር ኣማልኽቲ እያ!” ወይ ከኣ “እታ ማሕበር ማሕበር ኣማልኽቲ እያ!” ኢልካ ትምህር? ብፊደል ጥራይ እትጐዓዝ ዕዉር እንተ ዀንካ ደኣ እወ ትምህር ግዲ! ወይ ከኣ ንወለዶ ንምድንጋር እተላኣኽካ መስሓቲ ኢኻ!
ብድንቁርና ብዘይ ፍልጠት ገርካዮ እንተ ዀንካ፡ ሃየ ተነሳሕ! ተመለስ! መን ዘይጋገ! እቲ ዝኸፍኤ ነገር ካብ ገይጋኻ ዘይትምለስ እንተዀንካ እዩ! እዚ ከኣ ዓመጸኛን መስሓትን ምዃንካ እዩ ዚገልጽ! No way! ዋዛ ኣይምሰልካ! ምልክቲ ኪንገብረልካ ኢና!
ንሃይሉ ዮሃንስ ከምዚ በልዎ፡ መዝሙር 82፡1 በቲ ዓንቀጽ እቲ ምሉእ ምዕራፍ ኣንብቦ ኣሞ ካብቲ ገይጋ ትምህርትኻ ተመለስ ተነሳሕ በልዎ!
ብመሰረት እቲ ዓንቀጽን ብመሰረት እቲ ናይ ኣምሓሪኛን ትግሪኛን መጽሓፍ ቅዱስ ትርጉም እንተዳ ከድና፡ እቲ “ማሕበር ኣምላኽቲ” ዝብል ሓሳብ፡ ነቲ ናይቶም ኣብ ልዕሊ ህዝቢ እስራኤል ዚፈርዱ ጉባኤ ፈርድቲ፣ ኣኼባ እቶም ፈረድቲ/the meeting or assembly of the judges) ጥራይ እዩ ዝዛረብ ዘሎ፡ ንኣኼባ (Assembly) እቲ ምሉእ ህዝቢ ኣምላኽ ኣይኰነን ዝዛረብ ዘሎ በሉለይ ንሃይሉን እቶም ተማሃሮኡን!
ብመሰረት እቶም ካልኦት ብዙሓት እተፈላለዩ ናይ እንግሊዝኛ ትርጉማት እንተዳኣ ኣንቢብናዮ እሞ፡ መዝሙር 81፡ ትርጉሙ ከምቲ ኣብ ትግሪኛ ወይ ኣምሓሪኛ ዘሎ ዘይኰነስ ኣቀማምጣ እቲ ቃላት ይፍለ እዩ። ነኣብነት ነዚ ዝስዕብ እተፈላለየ ትርጉም ኣንብቡ፦
New International Version
A psalm of Asaph. God presides in the great assembly; he renders judgment among the “gods”:
New Living Translation
A psalm of Asaph. God presides over heaven’s court; he pronounces judgment on the heavenly beings:
English Standard Version
God has taken his place in the divine council; in the midst of the gods he holds judgment:
New American Standard Bible
A Psalm of Asaph. God takes His stand in His own congregation; He judges in the midst of the rulers.
King James Bible
A Psalm of Asaph. God standeth in the congregation of the mighty; he judgeth among the gods.
Holman Christian Standard Bible
A psalm of Asaph. God has taken His place in the divine assembly; He judges among the gods:”
International Standard Version
God takes his stand in the divine assembly; among the divine beings he renders judgment:
NET Bible
A psalm of Asaph. God stands in the assembly of El; in the midst of the gods he renders judgment.
New Heart English Bible
God presides in the assembly of God. He judges among the gods.
Aramaic Bible in Plain English
God stands in the assembly of the Angels and among the Angels he will judge.
GOD’S WORD® Translation
[A psalm by Asaph.] God takes his place in his own assembly. He pronounces judgment among the gods:
JPS Tanakh 1917
A Psalm of Asaph. God standeth in the congregation of God; In the midst of the judges He judgeth:
New American Standard 1977
God takes His stand in His own congregation;
He judges in the midst of the rulers.
Jubilee Bible 2000
God stands in the congregation of the mighty; he judges among the gods.
King James 2000 Bible
God stands in the congregation of the mighty; he judges among the gods.
American King James Version
God stands in the congregation of the mighty; he judges among the gods.
American Standard Version
God standeth in the congregation of God; He judgeth among the gods.
Douay-Rheims Bible
A psalm for Asaph. God hath stood in the congregation of gods: and being in the midst of them he judgeth gods.
Darby Bible Translation
{A Psalm of Asaph.} God standeth in the assembly of God, he judgeth among the gods.
English Revised Version
A Psalm of Asaph. God standeth in the congregation of God; he judgeth among the gods.
Webster’s Bible Translation
A Psalm of Asaph. God standeth in the congregation of the mighty; he judgeth among the gods.
World English Bible
God presides in the great assembly. He judges among the gods.
Young’s Literal Translation
— A Psalm of Asaph. God hath stood in the company of God, In the midst God doth judge
ኣየናዩ ትርጉም ውሰድ ብዘየገድስ፡ መልእኽቲ እቲ ምሉእ ዓንቀጽ ብዋላ ሓደ መገዲ ኣይልወጥን እዩ ፈጺሙ! ንጹር መልእኽቲ እቲ ምሉእ ዓንቀጽ መዝሙር 82 እዚ እዩ፡=> ንሱ ከኣ እቲ “ኣማልኽቲ” ዝብል ቃል ነቶም ኣብ ልዕሊ እቲ ምሉእ ህዝቢ እስራኤል ንኪፈርዱ ኣምላኽ ዝመዘዞም ብቁጽሪ ውሱናት ዚዀኑ ፈረድቲ ሰባት ጥራይ ኣመልኪቱ እዩ ኣብዚ ምሉእ ምዕራፍ እዚ ተጠቂሱ ዘሎ! ነቲ ምሉእ ህዝቢ እስራኤል ኣመልኪቱ ኣይተጠቅሰን ፈጺሙ!
እዚ ድሕሪ ምባል ናብ ዮሃንስ 10:31-39 ንመለስ!
ኣቀዲመ ኣብ ላዕሊ ከም ዝጠቀስኩዎ፡ ኣብዚ ክፍሊ እዚ ጐይታና የሱስ፣ “ኣማልኽቲ” ዝብል ቃል ካብ መዝሙር 82 ዚጠቀሰሉ ምኽንያት፡ ንሱ ሓደ ካብቶም ናይ ምድሪ ኣማልኽቲ ከም ዝዀነ ብዛዕባ ርእሱ ኪዛረብ ስለ ዝደለየ ኣይኰነን ፈጺሙ! ንሱ እሞ ሓደ ካብ ናይ ምድሪ ኣማልኽቲ ዘይኰነስ በቲ ፍጹም ዘይልወጥ ባህሪኡ፡ንሱ ዘለኣለማዊ ኣምላኽ፣ ማዕረ ኣምላኽን ፈጣሪ ኩሉን እዩ።
“ቃል ብመጀመርታ ነበረ፡ እቲ ቓል ድማ ኣብ ኣምላኽ ነበረ፡ እቲ ቓልውን ኣምላኽ ነበረ። እዚ ብመጀመርታ ኣብ ኣምላኽ ነበረ። ብእኡ ዅሉ ዀነ፡ ካብቲ ዝዀነ ዘበለ ድማ ብዘይ ብእኡ ዝዀነ የልቦን።” (ዮሃንስ 1፡1-3)
ጐይታና የሱስ ብስጋ ካብ ድንግል ቅድሚ ምላዱ፡ በቲ ፍጹም ዘይልወጥ ባህሪኡ፡ ንሱ ዘለኣለማዊ ኣምላኽ፣ ማዕረ ኣምላኽን ፈጣሪ ኩሉን እዩ!
ብስጋ ተወሊዱ ዓቢዩ፣ ኣብቲ ምሉእ ብስጋ ዝነበረሉ ዘመንውን በቲ ፍጹም ዘይልወጥ ባህሪኡ፡ ንሱ ዘለኣለማዊ ኣምላኽ፣ ማዕረ ኣምላኽን ፈጣሪ ኩሉን እዩ!
እዚ እቲ ሓቂ ኪነሱ፡ እሞ ከመይ ኢልና ደኣ “ንሱ ሓደ ካብ ናኣሽቱ ኣማልኽቲ ከም ዝዀነ ንምርግጋጽ ኢሉ መዝሙር 82 ጠቂሱ” ዚዓይነቱ ንዘስምዕ ሓሶት ኪንኣምኖ ንኽእል ሎሚ!?
ጐይታ “ኣማልኽቲ” ንዝብል ቃል ካብ መዝሙር 82 ዚጠቀሰሉ መሰረታዊን ንጹር ዕላማ፡ ጐይታና ንኣይሁድ ብፍላይ ካብ ዮሃንስ 5፡17 ጀሚሩ፡ “ኣነ ወዲ ኣምላኽ እየ!” ምስ በሎም፡ ንስኻ ትጻረፍ ኣለኻ፡ ሰብ ክነስኻ ከመይ ገርካ ኣነ ወዲ ኣምላኽ እየ ትብል ኣሎኻ ኢሎም፡ ብተሪርን ብኸቢድ ጽልእን ይጻረርዎ ስለ ዝነበሩ፡ ሓደ መነጻጸሪ ሓቂ ካብ ሕጎም ጠቂስሎም።
“ኣብ ሕግኹም ሰባት ኪነሶም ግናኸ በቲ ዝነበሮም መዝነት ፡ ማለት ፈርዲቲ ህዝበይ ንኺኰኑ፡ ነዚ ዓይነት መዝነት ዝዀውን ቃል ስለ ዝመጻሎም፡ ኣማልኽቲ ተባሂሎም ኣለዉ፡፡ እሞ ኣነ ደኣ ሎሚ ወዲ ኣምላኽ እየ ስለ ዝበልኩኹም ስለ ምንታይ ኪትቀትሉኒ ትደልዩ ኣለኹም!?” እዩ ዝብሎም ዘሎ ጐይታ!
ንመዝሙር 82 ንኸነጻጽር ደኣ ጠቂስዎ እምበር፡ በቲ ትኽክለኛ መንነቱ መጺእካ፡ ጐይታና ልዕሊ ኩሎም ናኣሽቱ ኣማልኽቲ ደኣ እምበር (ናኣሽቱ ኣማልኽቲ ዝበሃሉ እንተሊዮም ማለት እዩ!) ንሱስ ሓደ ካብ ናኣሽቱ ኣማልኽቲ ኣይኰነን ፈጺሙ!
ካብ መሰረቱ እቲ ንጹር ሓሳብ ዮሃንስ 10፡ ብዛዕባ ኣማልኽቲ ኣይኰነን። ብዛዕባ እተን ናይ ሓቂ ኣባጊዒን ፡ እቲ ናይ ሓቂ ጓሳ፡ ንሱ ከኣ እቲ እንኮ ወዲ ኣምላኽን እዩ! (ዮሃንስ 10፡1-30)
ኣይሁድ እኮ ይጽበዩ ነይሮም እዮም። ሓደ ወዲ ኣምላኽ፡ ንሱ ከኣ እቲ ናይ ሓቂ መሲህ ካብ ሰማይ ከም ዝመጽእ ይፈልጡን ይጽበዩን ነይሮም እዮም። በቲ ኣዚዩ ዝገርምን ፍሉይ ናይ ትሕትና ኣወላልዳን ቀዳማይ ምጽኣት ጐይታና ስለ እተዓንቀፉ ግና ኣይተቀበልዎን። ስለዚ ከኣ ኪቀትልዎ ደልዮም።
እዚ ሓቂ እዚ እዩ ዝገልጽ ዘሎ ዮሃንስ 10:31-39!
“ኣነ ወዲ ኣምላኽ እየ! ነባጊዔን ህወት ኪህበንን፡ ከይጠፍኣ ኪሕልወንን ምሉእ ስልጣን ኣሎኒ! ካብ ኢደይ ዝምንዘዐን ሓይሊ የለን! ካብ ኢድ ኣቦይ ዝምንዘዐን ሓይሊ የለን! ኣነን ኣቦን ሓደ ኢና!” ምስ በሎም ኣይሁድ ነዲዶም!
ንስኻ ሰብ ኢኻ! ዓሌትካ፣ ወለድኻ ንፈልጦም ኢና! ወዲ ኣምላኽ ኣይኰነንካን ትጻረፍ ኣሎኻ እዮም ዝብልዎ ዘለዉ!
ጐይታ ከኣ ወዲ ኣምላኽነቱ ንኸረደኦም፡ ንመነጻጸሪ ዝኣክል ማለት እዩ፡ ሰባት ኪነሶም ግናኸ በቲ እተመዝዝዎ ሽመት መሰረት ኣማልኽቲ እተባህሉ ካብ ሕጎም ጠቂሱሎም!
ከም ሓቂ እዞም ሎሚ ካብቲ ጐይታና የሱስ ንሱ ወዲ ኣምላኽ ከም ዝዀነ ብምዝራቡ ተኸሲሱሉ ኣብ ዝነበረ እዋን፡ ምስቲ መንነት ገዛእ ርእሱ ኣተኣሳሲሩ ዝጠቀሶ ክፍሊ ተበጊሶም (ንሱ ከኣ ዮሃንስ 10:34-36) “ንሕና ኣማልኽቲ ኢና!” ኢሎም ዝምህሩ ዘለዉ ሰባት፡ “ንርእስኹም ምስ ክርስቶስ እቲ እንኮ ፍሉይ ወዲ ኣምላኽ ተመዓራሪዩ ኣለኹም!” ተባሂሎም ኪኽሰሱ ጊቡእ እዩ!
ስማዕ ኣንባቢ! ዮሃንስ 10:31-39 ንሰዓብቲ ክርስቶስ ኣመልኪቱ ኣይዛረብን ፈጺሙ! እዚ ከኣ ነቲ ኣብ ዮሃንስ 10፡34-36 ዘሎ ኣማልኽቲ ዝብል ሓሳብ ኰላይ የጠቃልል ማለት እዩ! ዮሃንስ 10-31-39 ብንጹር ብዛዕባ ጐይታና የሱስ ጥራይ እዩ ዝዛረብ ዘሎ!
ኣብዚ ክፍሊ እዚ፡ ጐይታና የሱስ ብዛዕባ እቲ ፍሉይ መንነቱ እዩ ዚማጐት ዘሎ። እዚ ፍሉይ መንነቱ እዚ ድማ እቲ ኣቀዲሙ ኣብ 10:1-30 ብንጹር ተገሊጹ ዘሎ እዩ!
እንታይ እንታይ ዝብል ዝርዝር ዚሓዘ እዩ እዚ?
1. ጐይታና የሱስ እቲ እንኮ በይኑ ደገ ኣባጊዕ እዩ! (ዮሃንስ 10:1,7, 9)
2. እቲ ነባጊዑ በብስመን ጸዊዑ ዘውፍረን ቀቅዲሚኤን ድማ ዝኸይድ ጐይታና የሱስ ጥራይ እዩ! (ዮሃንስ 10:3, 4)
3. እቲ ነቶም ብእኡ ኣቢሎም ዚኣትዉ ኩሉም ዘድሕን መጓሰዪውን ዚህብ ጐይታና የሱስ ጥራይ እዩ! (ዮሃንስ 10:9)
4. እቲ ህይወት ምስ ተረፉ ምእንቲ ኪረኽባ ካብ ሰማይ ዝመጸ ጐይታና የሱስ ጥራይ እዩ! (ዮሃንስ 10፡10)
5. እቲ ህይወቱ በጃ ኣባጊዑ ዘሕልፍ እንኮ በይኑ ሕያዋይ ጓሳ ጐይታና የሱስ ጥራይ እዩ! (ዮሃንስ 10፡11,14)
6. እቲ እንኮ በይኑ ጓሳ እቲ ምሉእ መጓሰ ጐይታና የሱስ ጥራይ እዩ! (ዮሃንስ 10፡16)
7. እቲ ንህይወቱ በጃ ኣባጊዑ ከሕልፋ፡ መሊሱውን ኪወስዳ ስልጣን ዘለዎ ሕያዋይ ጓሳ ጐይታና የሱስ ጥራይ እዩ! (ዮሃንስ 10:17-18)
8. እቲ “ኣባጊዔይ” ኪብል በይኑ ስልጣን ዘለዎ፡ ኣባጊዒውን ዘለዋኦ ጐይታና የሱስ ጥራይ እዩ! (ዮሃንስ 10:11,14, 16, 26, 27)
9. እቲ ነባጊዑ ህይወት ዘለኣለም ዝህብ፣ እቲ እተን ኣባጊዑ ኩለንውን ንእኡ ጥራይ ኪስዕባ ዚግባእ፡ ጐይታና የሱስ ጥራይ እዩ! (ዮሃንስ 10፡28)
10. “ነባጊዔይ ካብ ኢደይ ዚምንዘዔን የልቦን! ኣነን ኣቦን ሓደ ኢና!” ኪብል ዝኽልእ ጐይታና የሱስ ጥራይ እዩ! (ዮሃንስ10፡28-30)
ዮሃንስ 10፡31-39 ንሰዓብቱ ኣመልኪቱ ዘይኰነስ ንጐይታና የሱስ ጥራይ ኣመልኪቱ እዩ ተጠቂሱ፡፡ ዮሃንስ 10፡31-39 ብመንጽር እቲ ኣብ ዮሃንስ 10:1-30 ዘሎ፡ ኣብዚ ኣብ ላዕሊውን ዘርዚረዮ ዘለዂ 10 ፍሉይ መንነት፣ ዕዮን ፍሉይ ሰማያዊ ተልእኾን ጐይታና መድሓኒና የሱስ እዩ ተጠቂሱ። ንዮሃንስ 10፡31-39 ጐይታና መንነቱን ተልእኾን ንምንጻር እዩ ንገዛእ ርእሱ ጥራይ ተቂስዎ። እቲ ኣብ ዮሃንስ 10፡1-30 ዘሎ ፍሉይ መንነትን ዕዮን ጐይታና፡ ንእኡ ጥራይ ዝምልከት፡ ከም ምዃኑ መጠን፡ ኣብ ዮሃንስ 10:31-39 ዘሎ ዝርርብ ከኣ ንጐይታና የሱስ ጥራይ ዝምልከት ደኣ እምበር ካልእ ሰብ ንገዛእ ርእሱ ኣመልኪቱ ኪጠቅሶ ኣይተገበኤን! እቲ ክፍሊ ንከምዚ ዓይነት ክሌም/claim/ ወይ ይግባኣኒ ዝብል ብሂል ስፍራ ኣይህብን ፈጺሙ!
ክሌም ዝገብር/ ነቲ ናይ የሱስ ዘረባ ናብ ርእሱ ወሲዱ ዝጥቀመሉ ሰብ፡ዝዀነ ሰብ እንተሎ ግና፡ ካልእ ዘይኰነስ ፡ ከምቲ ጐይታና ንመዝሙር 82 ዚጠቀሶ ምጥቃስ ጥራይ ዘኰነ፣ “ንሕና ወይ ከኣ ኣነ ኣማልኽቲ እየ!” ጥራይውን ዘይኰነ፡ ነቲ ንጐይታና መድሓኒና የሱስ ጥራይ ዚግባእ፡ ኣብ ዮሃንስ 10፡1-30 ዘሎ ከይተረፈ ብምጥቃስ እውን “ኣነ ወዲ ኣምላኽ እየ! ኣነ እቲ ደገ ኣባጊዒ እየ! ኣነ ሕያዋይ ጓሳ እየ! ኣነ ነባጊዔይ ይህወት እህበን እየ! ካብ ኢደይ ዝምንዘዐን የለን! ኣነን ኣቦን ሓደ ኢና!’ ኰላይ ይበለና!
ብርግጽ ከኣ እናፈለጠ ዲዩ ዋላስ ብድንቁርና ኣይፈልጥን ኣምላኽ ይፈልጥ፡ ብመትከል/principle/ እቲ ዓንቀጽ እቲ ጽሑፍ መሰረት፡ እቲ ጐይታና የሱስ ነቶም ነቲ ኣብ ዮሃንስ 10:1-30 ንዘሎ ፍሉይ መንነቱን ተልእኾኡን ንዝነጸጉ ሰባት ብዛዕባ መንነቱ መልሲ ንምሃብን ንምምጓትን ዚጠቀሶ ክፍሊ; ንሱ ከኣ ዮሃንስ 10:31-38 ጠቂሱ፡ “ኣነ ኣማልኽቲ እየ!/I am God!/ ንሕና ኣማልኽቲ ኢና/we are Gods!” ዝብለና ሰብ፡ ከይተፈለጦ ድዩ ወይስ ኰነ ኢሉ፡ እቲ ኣብ ዮሃንስ 10:1-30 ዘሎ ንጐይታና የሱስ ጥራይ ድማ ዝምልከት መንነትን ተልእኮን (ኣብ ላዕሊ ዝዘርዘርኩዎም፡ ንጐይታና የሱስ ጥራይ ድማ ዝምልከቱ 10 መሰረታዊ ሓቂታት) ናተይ እዩ፡ እዩ ዝብለና ዘሎ! ምኽንያቱ እዚ ሰብ እዚ ርእሱ ምስ ክርስቶስ ኣመዓራሪዩ ኣሎ! ርእሱ ምስ ክርስቶስ ስለ ዘመዓራረይ ጥራይ እዩ ነቲ ኣብ ዮኡሃንስ 10፡34-36 ዘሎ፡ ንሱ ከኣ ጐይታ ብዛዕባ ገዛእ ርእሱ (ብዛዕባ ኣመንቲ ዘይኰነስ ብዛዕባ ገዛእ ርእሱ) ኪዛረብ ከሎ፡ካብ መዝሙር ዳዊት 82 ዚጠቀሶ “ኣማልኽቲ” ዝብሎ ሓሳብ ጠቂሱ “ንሕና ኣማልኽቲ ኢና!” ዝብል ዘሎ!
ኣብ ዮሃንስ 10:31-36 ብዘሎ ክፍሊ ርእሱ ምስ ክርስቶስ ካብ ኣመዓራረየ፡ በቲ ኣብ ዮሃንስ 10፡1-30 ዘሎ ፍሉይ መንነትን ዕዮ ክርስቶስ ኰላይ ርእሱ ምስ ክርስቶስ ኣመዓራርዩ ኣሎ እሞ፡ እዚ ከኣ ካልእ ዘይኰነስ ንጹር ጸረ-ክርስቶስነት እዩ!
ብዙሓት ኣጽራረ ክርስቶሳት ናይ ዓለም መጺኦም ኣለዉ ጽሑፍ ስለ ዝዀነ እዚ ኣየገርምን እዩ! እቲ ዘገርም እቶም ተዓሚቶም ዝስሕቱ ዘለዉ ብዙሓት እዩ!
“ደቀየ፡ እዚኣ እታ ዳሕረይቲ ሰዓት እያ። ከምቲ፡ እቲ ጸረ ክርስቶስ ከም ዚመጽእ፡ ዝሰማዕኩምዎ፡ ካብ ሕጂውን ብዙሓት ኣጽራር ክርስቶስ ተንሲኦም አለዉ። እዚኣ እታ ዳሕረይቲ ሰዓት ምዃና በዚ ኢና እንፈልጥ።” (1ይ ዮሐንስ 2:18)
ኣብ ዮሃንስ 10:1-30 ዘሎ ፍሉይ መንነትን ዕዮን ተልእኾን፡ ንሱ ከኣ ከምዚ ዝስዕብ ዝብል፦
1. ጐይታና የሱስ እቲ እንኮ በይኑ ደገ ኣባጊዕ እዩ! (ዮሃንስ 10:1,7, 9)
2. እቲ ነባጊዑ በብስመን ጸዊዑ ዘውፍረን ቀቅዲሚኤን ድማ ዝኸይድ ጐይታና የሱስ ጥራይ እዩ! (ዮሃንስ 10:3, 4)
3. እቲ ነቶም ብእኡ ኣቢሎም ዚኣትዉ ኩሉም ዘድሕን መጓሰዪውን ዚህብ ጐይታና የሱስ ጥራይ እዩ! (ዮሃንስ 10:9)
4. እቲ ህይወት ምስ ተረፉ ምእንቲ ኪረኽባ ካብ ሰማይ ዝመጸ ጐይታና የሱስ ጥራይ እዩ! (ዮሃንስ 10፡10)
5. እቲ ህይወቱ በጃ ኣባጊዑ ዘሕልፍ እንኮ በይኑ ሕያዋይ ጓሳ ጐይታና የሱስ ጥራይ እዩ! (ዮሃንስ 10፡11,14)
6. እቲ እንኮ በይኑ ጓሳ እቲ ምሉእ መጓሰ ጐይታና የሱስ ጥራይ እዩ! (ዮሃንስ 10፡16)
7. እቲ ንህይወቱ በጃ ኣባጊዑ ከሕልፋ፡ መሊሱውን ኪወስዳ ስልጣን ዘለዎ ሕያዋይ ጓሳ ጐይታና የሱስ ጥራይ እዩ! (ዮሃንስ 10:17-18)
8. እቲ “ኣባጊዔይ” ኪብል በይኑ ስልጣን ዘለዎ፡ ኣባጊዒውን ዘለዋኦ ጐይታና የሱስ ጥራይ እዩ! (ዮሃንስ 10:11,14, 16, 26, 27)
9. እቲ ነባጊዑ ህይወት ዘለኣለም ዝህብ፣ እቲ እተን ኣባጊዑ ኩለንውን ንእኡ ጥራይ ኪስዕባ ዚግባእ፡ ጐይታና የሱስ ጥራይ እዩ! (ዮሃንስ 10፡28)
“ነባጊዔይ ካብ ኢደይ ዚምንዘዔን የልቦን! ኣነን ኣቦን ሓደ ኢና!” ኪብል ዝኽልእ ጐይታና የሱስ ጥራይ እዩ! (ዮሃንስ10፡28-30)
እዚ ዓሰርተ (10) ሓቂታት እዚ ንጐይታና የሱስ ጥራይ እተሓዝኤ መንነት፣ ዕዮን ተልኾን ከም ዝዀነ ኩሉ፡ ነዚ ፍሉይ መንነት፣ ዕዮን ተልእኾን ጐይታና ንእተቛወሙ ኣይሁድ ንምምጓትን መልሲ ንምሃብን እዩ ከኣ እዚ ኣብ ዮሃንስ 10፡31-39 ዘሎ ዝርርብን ግጥምን ተኻይዱ፡፡ በዚ ምኽንያት እዚ እዩ ከኣ ዮሃንስ10፡31-39፡ ንጐይታና የሱስ ጥራይ ዝመልክት! ኣብዚ ክፍሊ እዚ ኣመንቲ ኣይተጠቅሱን ፈጺሞም! እቲ ኣብ ዮሃንስ 10፡31-38 ዘሎ ሕቶን ኪትዕንውን ብዛዕባ ኣመንትን መንነት ኣመንቲን ኣይነበረን ፈጺሙ! እቲ ኪትዕ ብዛዕና መንነት ጐይታና የሱስ እዩ። እዚ ከኣ ብፍላይ ኣብ ዮሃንስ 10፡1-30 ተገሊጹ ዘሎ መንነቱ፣ ዕዮኡን ተልእኾኡን(ደገ ኣባጊዑ ምዃኑ፣ በጃ ኣባጊዑ ምዃኑ፣ ሓላው ኣባጊዑ ምዃኑ፣ ነባጊዑ ህይወት ዘለኣለም ዝህብ ምዃኑ ወዘተ ዚገልጽ መንነቱ) እዩ ነይሩ።
ጐይታ ነቶም ሰዓብቱ ኩሎም “ኣባጊዔይ!” ኢሉ ስለ ዝጸወዖም ኣይሁድ ኣይተቃወምዎን ፈጺሞም! ኣይሁድ እተቃወምዎ ነጥቢ ንጹ እዩ፡ ንሱ ከኣ ብዛዕባ መንነት ሰዓብቱ ዘይኰነስ ብዛዕባ መንነቱ እዩ! ወዲ ኣምላኽ እየ ስለ ዝበለ እዩ!
ዮሃንስ 10፡1-30 ንኣመንትን ትኽክለኛ መንነቶምን ብዝምልከት ብንጹር ይዛረብ፡ንሱ ከኣ ድምጹ ዚሰምዑ ኣባጊዒ መጓሴኡ ምዃኖም። ዮሃንስ 10፡31-39 ግና ብዛዕባ እዞም ኣባጊዒ እዚኦም ኣይዛረብን ፈጺሙ! ብዛዕባ እቲ እንኮ ፍሉይ ሕያዋይ ጓሳኦም፡ ንሱ ከኣ ክርስቶስ ወዲ ህያው ኣምላኽን ዚገጠሞ ተቃውሞን ዚመለሶ መልስን እዩ ዝዛረብ!
እዚ ኣብ ዮሃንስ 10፡31-39 ዘሎ ክፍሊ ብዛዕባ መንነት ኣመንቲ ኣይኰነን ዝዛርብ። ብዛዕባ መንነት ጐይታ ንዝቀረበ ኪሲ ዝምጉት ክፍሊ እዩ፡ ስለዚ ከኣ ንጐይታ እዩ ዝምልከት!
ብዛዕባ መንነት ኣመንቲ ዝዛረብ ክፍሊ ዮሃንስ 10፡1-30 እዩ! ኣብዚ ምሉእ ክፍሊ እዚ ድማ ንሕና እቶም ናይ ክርስቶስ ዘበልና ኩላህና፡ ኣባጊዕ ከም ዝዀንና ጥራይ ደኣ እምበር ኣማልኽቲ ከም ዝዀንና ኣይዛረብን ፈጺሙ! ኣብዚ ከኣ ኣይሁድ ዋላ ሓደ ተቃውሞ የብሎምን ምኽንያቱ ብዛዕባ ኣባጊዕን መጓሰን ኣጸቢቆም ይፈልጡ እዮም።
“ንዑ፣ ፍግም ኢልና ንስገድ፣ አብ ቅድሚ እግዚኣብሄር፣ ፈጣሪና፣ ንንበርከኽ። ንሱ ኣምላኽና እዩ፡ ንሕና ድማ ህዝቢ መጓሴኡ፡ ኢዱ እትኽብክበን ኣባጊዑ ኢና …” (መዝሙር 95:6-7)
እምባኣር ኣይሁድ ኣብ ዮሃንስ 10 ንጐይታ እተቃወምዎ፡ ንሰዓብቱ ኣባጊዕ ስለ ዝበለ ኣይኰነን ፈጺሙ! ኣነ ወዲ ኣምላኽ እየ ስለ ዝበለ እዩ!
ጐይታ ንዮሃንስ 10፡34-36 ዚጠቀሰ ነቲ ኣብ ዮሃንስ 10፡1-30 ብንጹር ተገሊጹ ዘሎ ንክርስቶስ ጥራይ ኣተሓዝኤ ፍሉይ ወዲ ኣምላኽነቱን ተልእኾኡን ንእተቃወሙ ኣይሁድ ንምምጓት ደኣ እምበር ኣመንቲ ኩሎም ኣማልኽቲ ከም ዝዀኑ ንምምጓት ኣይኰነን ፈጺሙ!
እቲ በመቆላዊ ተዛራቢ (ማለት ጐይታና የሱስ) ከምኡ ኣይበለን ፈጺሙ! እዚ ማለት ኣብ ዮሃንስ 10፡3-4-36 ንኣመንቲ ኣመልኪቱ ኣይኰነን ኣይተዛረበን!ብዛዕባ ርእሱ እዩ ተዛሪቡ!
ነቲ ናይ መጀመርታ ጸሓፊውን (ንወንጌል ዮሃንስ ዝጸሓፈ ዮሃንስ ሃዋሪያ)፡ ጐይታና የሱስ ኣብዚ ክፍሊ ኣመንቲ ኣማላኽቲ እዮም ከም ዝበለ ኣይፈልጥን ፈጺሙ!
ንኣይሁድ ነቶም ናይ መጀመርታ ሰማዕቲውን ከምኡ ኣይተረደኦምን ፈጽሙ!
ንሳቶም “ኩሉም ኣመንቲ ኣማልኽቲ እዮም!” ዝብል ሓሳብ ካብ ጐይታ ኣይሰምዑን ፈጺሞም!
ኣብ ዮሃንስ 10፡34-36 ጐይታ ብዛዕባ ርእሱ ጥራይ እዩ ተዛሪቡ!
ብርግጽ መዝሙር 82፡1-8 ኰነ ዮሃንስ 10፡1-42=> ኩሉ እቲ ህዝቢ ኣምላኽ ኣማልኽቲ ከም ዝዀነ ኣይዛረብን ፈጺሙ!
ዮሃንስ 10:31-39 => ብዛዕባ ኣመንቲ ኣይዛረብን ፈጺሙ! ዮሃንስ 10፡34-36=>ነቲ ኣብ ዮሃንስ 10:1-30=> ብንጹር ተገሊጹ ንዘሎ ፡ ንኻልእ ኣማኒ ከኣ ዘይግባእ ፍሉይ ወዲ ኣምላኽነት የሱስን ሰማያዊ ተልእኾኡን ንእተጻረሩ ኣይሁድ ንምምጓት፡ ምስ ገዛእ ርእሱ ብምትእስሳር ጐይታ ዚጠቀሶ ክፍሊ ደኣ እምበር ንኣመንቲ ዝምልከት ኣይኰነን ፈጺሙ!
እቶም ናይ ሓቂ ኣመንትን ትኽክለኛ መንነቶምን ብዛዕባ ዝምልከት እቲ ኣብ ዮሃንስ 10፡1-30 ብንጹር ተቐሚጡ ዘሎ ሓቂ እዩ፡ ንሱ ከኣ ድምጺ እቲ እንኮ በይኑ ሕያዋይ ጓስ ኦም ፈሊዮም ኣለሊዮም ዚስዕብዎ ኣባጊዑ ምዃኖም! Period! Nothing less! nothing more! & nothing else!
እዚ ምዕራፍ እዚ እቶም ሰዓብቲ ክርስቶስ፡ ገዛእቲ፣ ፈረድቲ፣ ኣማልኽቲ ከም ዝዀኑ ኣይዛረብን ፈጺሙ! ዮሃንስ 10 ብምልኡ እቶም ናይ ሓቂ ሰዓብቲ ክርስቶስ ኩሎም፡ ኣባጊዒ ከም ዝዀኑ ጥራይ እዩ ዝዛረብ!
እዚ ከምዚ ዓይነት ሓሳብ (ማለት እቶም ሰዓብቲ ክርስቶስ ኩሎም ኣማልኽቲ እዮም ዝብል ሓሳብ) ኣብ ጐይታና የሱስ እቲ ናይ ዮሃንስ 10፡34-36 መበቆላዊ (ኦሪጅናል) ተዛራቢ ዀነ፡ ኣብ ሓሳብ እቲ ነዚ ምዕራፍ እዚ ዝጸሓፈ ሃዋሪያ ዮሃንስ ኣይነበረን ፈጺሙ!
እዚ ንሰብ ኣምላኽ ኪገብሩ ዚደለዩ ሰባት ጥራይ ዚሃውተትዎ ምህውታት እዩ!
ኣብዚ ምዕራፍ እዚ ኣደጊፎም፡ ወይ ከኣ ኣብ መዝሙር 82 ንዘሎ ክፍሊ ካብቲ ግቡእ ዓንቀጹ ወጻኢ ብምውሳድ ማለት እዩ፡ “ንሕና ኩላህና ኣመንቲ ኣማልኽቲ ኢና!” ኢሎም ዝምህርኹም መማህራን፡ ንርእሶም ብትምህርቶም ስሒቶም ንኣኩምውን የስሕቱኹም ኣለዉ እሞ ወይልኦም!ኣቱም እትስሕቱውን ወይልኹም!
“ካብዞም ብኣይ ዚእምኑ ናእሽቱ ንሓደ ዜስሕት ግና፡ መጥሓን ኣድጊ ኣብ ክሳዱ ተኣሲሩ ኣብ ዓሚቕ ባሕሪ ኺጥሕል ይሔሾ። መዓንቀፉ ኸይመጸ ኣይተርፍን እዩ እሞ፡ ወይለኣ ንዓለም ብሰሪ መዓንቀፊ። ምናዳ ነቲ ብሰሩ ስሕተት ዚመጽእ ሰብ ወይለኡ።” (ማቴዎስ 18:6-7)
“ንርእስኻን ንትምህርትኻን ተጠንቀቕ፡ በዚ ነገርዚ ጽናዕ። እዚ እንተ ገበርካስ፡ ንርእስኻን ነቶም ዚሰሞዑኻን ከተድሕን ኢኻ።” (1 ጢሞቴዎስ 4፡16)
Comment here